ग्रीष्म पेटला पेटला
थेंब आटला आटला
रखरखत्या उन्हात
कंठ भुईचा दाटला
 |
| Image Source - Google | Image by - India TV |
धरती व्याकूळ तहानेनं
अश्रुविना ती रडते
पहाटे डोलणारी वेली
दिवसा निपचित पडते
ग्रीष्म तुझा हा उकाडा
सृष्टीला सहावेना
भेगाळल्या धरणी आईला
पाण्याविना पाहवेना
लाही लाही तुझी ग्रीष्मा
पान फुलं हि भाजली
झळा सोसाण्यापरीस
पाखरं घरट्यात निजली
ग्रीष्मा तुझ्या या दिसात
यावी वळीवाची सर
जागा होईल रे तेव्हा
झोपी गेलेला निर्झर
ग्रीष्मा तुझ्या येण्यानं
रुसतं नदीतलं पाणी
कधी गारव्याला गाणारी
विसरली कोकीळाही गाणी
उन्हं सोसवेना ग्रीष्मा
सख्या वळीवाला पाड
मग पाहतील आनंदाने
धरती पानं-फुलं झाड
आम्हा ठाव आहे ग्रीष्म
काम तुझं तुला बरं
हाती तुझ्या रे आहे
सख्या वळीवाची सर ...
टिप्पणी पोस्ट करा